Orðhengilsháttur

Eðli máls breytist ekki með orðavali. Áróðursmeistari spilavíta fullyrðir að íslensk málnotkun sé neikvætt áróðursbragð og því eigi ekki að segja "spilavíti" heldur "kasínó". Eitthvað finnst mér sá málflutningur vera eftir á og úr tengslum við íslenskan veruleika. Þetta orðskrípi er í ætt við nafngiftir útrásarinnar sem hættu að reka fyrirtæki og áttu nú bara félög. Það var ekki nógu gott að kalla þau félög heldur urðu þau að heita "group" eða "holdings" eða "properties". Það er liður í því að búa til glansmynd sem fær ekki staðist vottun raunveruleikans á hvötunum að baki spilafíkn og skelfilegum afleiðingum hennar.

Það er mikil einfeldni ef við trúum því að það sé "gott að fá spilamennskuna upp á borðið". Þetta er rangt orðaval og sýnir kannski hvað áróðursmeistarar eru útsmognir. Þetta heitir fjárhættuspil og ef útlenskum orðum er ætlað að ná merkingunni betur þá er það kallað "gambling" upp á ensku. Spilavíti eru rekin til að græða. Gróðinn rennur ekki í vasa fjárhættuspilaranna heldur eigenda spilavítanna og þeir ganga svo frá hnútunum að húsið tapar ekki.

Jafnvel þó hér yrðu rekin lögleg spilavíti yrðu alltaf til leyniklúbbar þar sem meira er lagt undir og meiru tapað. Eigendur spilavíta mundu alltaf finna sér leiðir til að skjóta undan skatti, þó ekki væri með öðrum leiðum en að kalla gróðann útlenskum nöfnum í bókhaldinu.

Það yrði orðspori Íslands síst til framdráttar að opna hér spilavíti. Hér hafa fjárhættuspilarar útrásarinnar þegar rúið landið inn að skinni og þeir borga ekki brúsann sinn. Ef þeir voru spurðir út í vafasama gjörninga sína, var viðkvæðið ávalt að þetta væri allt löglegt. Samt var sú spilamennska ekki uppi á borðinu. Ég hef enga ástæðu til að treysta fyrirætlunum gróðafíkla, hvort sem þeir kalla sig fjárglæframenn eða "bossa" upp á ensku.

„Kasínó er raunhæfur kostur“

Athugasemdir

[Lundi (IP-tala skráð) 9.2.2010 kl. 08:06]

Þetta er afar einhliða umræða á mbl.is, eins og svo oft, enda miðill gróðravæðingar. Að lögleiða spilavíti eins og það sé einhver lausn á ólöglegu athæfi fólks er þvílík rökleysa. Á ekki bara að lögleiða morð þar sem að við vitum að fólk fremur þau hvort eð? Betra að vita hvar þau eru framin og hafa auga með þessu liði?

Það segir í fréttinni að þarna skapist 70 störf. En á kostnað hvers? Ég er alfarið á móti þessu. Eins og Júlíus, forsvarsmaður Samband Áhugafólks um Spilafíkn benti á í Kastljósinu í gær þá væri ansi glannalegt að opna spilavíti á Íslandi eins og staðan er. Hversu margir munu reyna að "vinna" tilbaka tapaða aura í góðærinu og missa síðustu krónurnar í vasa gráðugra einstaklinga.

[Birkir Ingason (IP-tala skráð) 9.2.2010 kl. 09:26]

Ég hef aldrei á ævi minni stigið fæti inn í Spilavíti, Kasínó, Fjárhættuspilastað. Ég kann bara Olsen.olsen. Mér leikur bara forvitni á að vita hvað finnst þér um spilakassa SÁÁ ???

[Sylvía (IP-tala skráð) 9.2.2010 kl. 09:27]

Skemmtilega orðað hjá þér og mjög góðir punktar!:)

[Karma (IP-tala skráð) 9.2.2010 kl. 11:00]

Mér finnst þetta allt of mikil einföldun hjá þér.

Þú virðist tala um að þeir sem vilja "græða" sé ekki treystandi og því ætti aldrei að taka undir hugmyndir þeirra en auðvitað er undirstaða alls einkareksturs gróði, hvort sem það er spilavíti, matvöruverslun eða leikskóli.

Einnig fellur þú í þá vinsælu gryfju að vinna skoðunum þínum fylgi með því að líkja þessum mönnum við útrásarvíkinga og því sé hugmyndir þeirra sjálfkrafa vondar því allir vita að allt sem kemur frá útrásarvíkingum er slæmt.

Lokum fullyrðir þú án þess að rökstyðja að eigendur spilavíta muni svíkja undan skatti líkt og það sé sjálfgefið.

Hvort að löglegt spilavíti minnki eða auki vandamál tengd spilafíkn veit ég ekki (og er reyndar efins að þau séu til góðs) en ég er samt tilbúinn að taka þátt í fordómalausri og málefnalegri umræðu um þessi mál og allar mögulegar breytingar á núverandi kerfi því ég efast um að það sé fullkomið.

[summ (IP-tala skráð) 9.2.2010 kl. 12:12]

Mér finnst bara alls ekki réttlætanlegt að leyfa það sem er rangt til þess að geta haft auga með því.  Það hljóta að vera betri leiðir.

Það væri t.d. hægt að bjóða fólki verðlaun fyrir að koma upp um ólögleg spilavíti.  Verðlaunaféð yrði svo bara tekið af eiganda spiavítisins.  Þegar upp kæmist um spilavíti væru svo bara ákveðnar verklagsreglur sem farið væri eftir og sektin það há að enginn þorir að taka þátt í slíku.

Ef hætta væri á að fólk færi til lögreglunnar og fengi verðlaun fyrir að segja frá, þá væri erfitt fyrir eigendur spilavíta að halda þeim gangandi... þeir þyrftu að hafa svakalega mikið traust á fólkinu sem þeir eru að hafa að féþúfu.

Eins finnst mér fáránlegt að leyfa spilakassa í sjoppum (eða annarsstaðar).  Þetta er alltaf afsakað með því að gefa einhvern pening í góðgerðarmál.  En það er náttúrulega alveg ljóst að þeir sem spila í ´þessum kössum eru ekki að gera það til þess að gefa í góðgerðarmál.  Þeir eru að reyna að vinna peninga... en tekst það nú sjaldnast.

Ég hef sjálfur kynnst svona spilakössum og veit að þeir eru algjört spila-víti . Ég tapaði nú aldrei stórum fjármunum en samt slatta miðað við að ég var bara skólastrákur.

Ég fór á hverjum degi með kannski 500 - 2000 krónur.  Þegar ég tapaði þá ætlaði ég að vinna það til baka daginn eftir.  En ef ég vann þá var ég með minni sektarkennd þegar ég eyddi vinningnum daginn eftir.

Ég man að stærsti vinningurinn sem ég vann var ca. 25.000.  Hann fór allur daginn eftir og meira til... enda fékk ég peningabragðið í munninn þegar ég fékk kr. 25.000 í 50-köllum.

Ég vissi alltaf að það væru litlar sem engar líkur á að ég myndi vinna eitthvað en það var bara tilhugsunin um hvað það yrði æðislegt ef ég myndi vinna.

...

svo vil ég benda á að þetta var lögleg starfsemi... spilakassar í kringlukránni sem ég fór oft í.  En ekki var eftirlitið þar eitthvað sérstakt.  Ekki kippti neinn sér upp við það að ég kæmi á hverjum degi... og hvað þá því að ég var undir lögaldri.  Þannig að þetta eru ekki góð rök hjá fótboltastrákunum.

Hann Bjarki hljómaði reyndar í Kastljósinu eins og hann væri að reyna að sannfæra sjálfan sig í leiðinni.

[Ólöf Ingibjörg Davíðsdóttir, 9.2.2010 kl. 15:30]

Summ: Þakka þér fyrir að deila reynslu þinni með okkur.