Þakkargjörðarhátíð

Þakkargjörðardeginum varði ég með fjölskyldu Mollie, skólasystur minnar, á heimili systur hennar í Purcellville í norðurhluta Virginia fylkis. Hinn ómissandi kalkúnn var á borðum með öllu tilheyrandi og margar tegundir af pæjur í eftirmat. Þar á milli fór ég í gönguferð um bæinn með systurinni og föður þeirra.

Það eru mörg falleg hús í bænum, hús í viktoríönskum stíl, hús í stíl þriðja áratugarins og svo enn eldri hús. Eitt þeirra frá 1870 var til sölu á litla 750 þúsund dollara. Ég fann hús sem mig langar í, blátt hús með turni og er mynd af því hér til hliðar. Við gengum eftir Aðalstræti sem á annatíma hefur bíl við bíl en var nú autt og hljótt enda tækifærið notað til að flytja landbúnaðarvélar. Þarna eru enn smáfyrirtæki í einstaklingseigu, s.s. úrsmiður (sem getur tekið sér 6 mánuði til að gera við úrið þitt), járnvörubúð með upprunalegum innréttingum frá seinni hluta 19. aldar þar sem öllu ægir saman upp undir rjáfur, hlöðu í miðbænum sem breytt hefur verið í vinsælan veitingastað með öllum burðarvirkinu ófegruðu og síðast en ekki síst byssubúð.

Það var ómetanlegt fyrir mig að vera með fjölskyldunni þennan dag og fá hefðina beint í æð. Við matborðið var börnunum hlýtt yfir pílagrímasöguna eftir að ég hafði sungið "Þurfamaður ert þú mín sál" við einlæga eftirtekt viðstaddra enda stórfjölskyldan öll kennaramenntuð og hefur fóstrað 21 skiptinema í gegnum árin. Til að ljúka deginum með tilhlýðilegum hætti var ég send til baka með matarafganga sem ættu að duga mér fram eftir helgi.

 

Athugasemdir

[Snorri Halldórsson (IP-tala skráð) 28.11.2008 kl. 08:12]

Mikið hefur það verið gaman að fá að upplifa hátíðina á þennan hátt.

[SM, 30.11.2008 kl. 09:38]

Ameríka, það er ekki laust við að maður sé pínu farinn að sakna sums þar...3 mánuðum seinna...

[Guðrún mágkona (IP-tala skráð) 2.12.2008 kl. 15:08]

Sæl kæra mágkona!

 Mikið hefur þetta verið ómetanlegt ævintýri að fá að upplifa þakkargjörðarhátíð með heimamönnum, I envy you.

Kærar kveðjur,

Guðrún