Aura minna tal

Nú geta námsmenn aftur farið að millifæra fé frá Íslandi í gegnum heimabanka. Ég sendi fyrstu greiðsluna eftir bankahrunið í gegn áðan. Mig svíður illilega undan gengisfallinu. Ég keypti 500 dollara sem í dag munu kosta kr. 70.500. Í september kostaði sama upphæð mig kr. 55.000. Krónan á víst af fara í frjálst fall og ég hlakka ekki til að reyna að borga skólagjöldin mín í janúar. Ég veit ekki hvernig framfærslan á að ganga út önnina því ég verð að taka af framfærsluláninu frá LÍN til að ná upp í skólagjöldin. Bókakostnaðurinn gengur líka langt á framfærslulánið því bókakaupalánið dugar engan vegin fyrir námsefninu.

Það er ekki um neina námsstyrki fyrir mig að ræða við Wesley Theological Seminary vegna þess að ég er ekki meðlimur í kirkju meþódista, er ekki frá spænskumælandi landi né blökkukona. Ég hef ekki íslenska námsstyrki. Mikið vildi ég að Þjóðkirkjan sæi sóma sinn í að halda úti námsstyrkjum til guðfræðináms. Það er hennar hagur að hafa vel menntað fólk á sínum snærum og eykur gæði starfs hennar með landsmönnum. Það er líka mikilvægt fyrir dýpt og breidd guðfræðiiðkunar á Íslandi að fólk haldi utan til náms.

Í gær innritaði ég mig á námskeið við American University. Þetta er með stærri háskólum í Washington DC og einkar þægilegt því hann er bara í "næsta húsi". Ég ætla að taka listasögu á meistarastigi þó ég hafi tekið hana í grunnnáminu við HÍ. Góð vísa verður aldrei of oft kveðin. 

Myndin af mér var tekin þegar ég sótti tónleika í listamiðstöð/listaskóla American University um helgina. Þar var flutt verk úr óperu eftir Rossini, saxófónverk eftir Erland von Koch, og svo Exodus eftir Händel. Tónleikarnir voru frábærir í alla staði og alveg yndislegt að geta sótt slíka viðburði í bakgarðinu.

Athugasemdir

[Baldur Gautur Baldursson, 21.11.2008 kl. 10:41]

Besta Ólöf!   Ég skil þig 100%   Ég er að berjast við að láta enda ná saman. Sel gamlar skólabækur, vinn eins og þræll og er að sligast undan reikningum og slíku.  Þegar ég kom til Svíþjóðar haustið 2004 var gengi íslensku krónunnar (ISK) í betra jafnvægi mót sænsku krónunni (SEK):

2004: 1 SEK = 8 ISK

2008: 1 SEK = 17.30 ISK

Þetta er okkur námsmönnum ekki bætt upp. Ég er búinn að skrifa til yfirvalda og til LÍN en án allra svara.   5 Íslendingar hafa hætt námi hér nærri mér og tveir af þessum höfðu sett sig í skuldir til að geta greitt leigu, skólabækur og mat!

[Sunna Dóra Möller, 21.11.2008 kl. 20:34]

Mikið er ég sammála þér að kirkjan ætti að vera með styrki tl náms, enda mætti ætla að góð menntun guðfræðinga væri hagur kirkjunnar ! Gangi þér vel !

[Carlos Ferrer (IP-tala skráð) 21.11.2008 kl. 20:53]

Hugsa til ykkar Snorra - þetta er ekki gott. Gangi þér vel.