Bizzarre Bazaar

Í morgun fór ég á kirkjubasar í næstu götu í þeirri von að komast yfir pott. Ég hafði ekki erindi sem erfiði en keypti þess í stað upphækkun fyrir rúm. Einkennileg skipti það. Þetta var mjög stór basar og kenndi þar ýmissa grasa eins og títt er um slíkt framtak. Þar rakst ég á þessa séramerísku vöru: rekkjubakstoð með höfuðpúða og innbyggðum yljara og nuddi ásamt leslampa, bollahöldu og vasa fyrir sjónvarpsdagskrá og fjarstýringu. Ég spurði fylgdarkonu mína hvort fólk keypti virkilega svona lagað. Hún var á því að þetta gæti hafa selst í þúsundum eintaka. Ætli þetta hafi verið fótanuddstækisígildi einhver jólin? Þegar við svo förum framhjá gjaldkeranum við útganginn var þar kona sem var búin að taka bakstoðina og sagðist kaupa þetta handa syni sínum. Ég er á því að annað hvort er sonurinn orðinn dauðleiður á afskiptasemi móður sinnar eða að hann er algjör sófakartafla.

Athugasemdir

[Baldur Gautur Baldursson, 8.11.2008 kl. 18:30]

Þetta er hrikalega amerískt!  Sófakartöflurnar hljóta að djúpsteikjast í þessum sófapottum hæginda og kransæðakíttis!   :)   Þeir eru sjálfum sér verstir blessaðir Kanarnir. 

[Carlos Ferrer (IP-tala skráð) 9.11.2008 kl. 15:24]

Rosalega er þetta áhugavert apparat! Ódýrara en hækkanlegt rúm, geri ég ráð fyrir, og algerlega þæginlegt. Keyptirðu eintak?

[Ólöf Ingibjörg Davíðsdóttir, 9.11.2008 kl. 15:28]

Nei, ég er ekki konan sem keypti þetta handa syni sínum.

[Jóhanna Magnúsar- og Völudóttir , 10.11.2008 kl. 23:19]

[Heidi Strand, 14.11.2008 kl. 07:56]

Eina sem hækkar þessa daganna eru vextir, börn og rúmið hennar Ólafar.